O Concello de Santiago aproba unha nova convocatoria do tradicional Mercado de Nadal, que se volverá celebrar en Carreira do Conde – do 28 de novembro ao 5 de xaneiro – e en Área Central – do 21 de decembro ao 5 de xaneiro –.
O horario de apertura será diario, de 12 a 14h e de 17 a 21:30h. Como excepcións, o 25 de decembro e o 1 de xaneiro permanecerá pechado, mentres que o 24 e 31 de decembro abrirá só pola mañá.
Poderán solicitar un posto no mercado as persoas comerciantes, artesás e produtoras con capacidade para producir, exhibir, elaborar e vender produtos. No proceso de selección serán prioritarios os produtos de carácter artesanal e valorarase a calidade, a orixinalidade e a produción a pequena escala para o caso de non seren produtos artesanais.
O prazo de inscricións manterase aberto desde o xoves 9 de outubro ata o martes 28 de outubro ás 14:00h. Faranse a través do formulario habilitado para tal fin, cuxa ligazón se atopa nas bases da convocatoria.
O 8 de novembro publicarase a listaxe provisional de quendas e emprazamentos, tendo as persoas interesadas ata o 13 de novembro para confirmar a súa aceptación das mesmas.
Con 15 casetas e un máximo de 5 postos exteriores de alimentación, o emprazamento en Carreira do Conde contará con cinco quendas de participación. No caso de Área Central, serán 15 casetas e dúas quendas. As datas son as seguintes:
- Quenda 1: Venres 28 de novembro a venres 5 de decembro (8 días ), en Carreira do Conde.
- Quenda 2: Sábado 6 a venres 12 de decembro (7 días), en Carreira do Conde.
- Quenda 3: Sábado 13 a Sábado 20 de decembro (8 días), en Carreira do Conde.
- Quenda 4: Domingo 21 a domingo 28 de decembro (8 días), en Carreira do Conde e Área Central.
- Quenda 5: Luns 29 de decembro a luns 5 de xaneiro (8 días), en Carreira do Conde e Área Central.
Con esta iniciativa, promovida desde o Departamento de Comercio, búscase promover o comercio de proximidade nunha das datas anuais que conta con maiores vendas. Para calquera dúbida ou consulta, as persoas interesadas poden contactar a través do enderezo electrónico recollido nas bases da convocatoria.
Bonos Corazón
Na mesma xunta de goberno, que se celebraba o 6 de outubro, aprobouse a segunda convocatoria dos Bonos Corazón 2025. Cun presuposto de 300.000€ destinado a esta segunda quenda, complétanse os 600.000€ do total da campaña para este ano.
O programa volve en outubro tras colleitar un grande éxito na primeira fase, celebrada en maio: cerca dun millón de euros gastados no comercio e hostalería locais e máis de 550 establecementos composteláns adheridos á campaña.
Documentos relacionados
Bases de participación no Mercado de Nadal 2025/2026
Formulario presentación de solicitude de participación no Mercado de Nadal 2025/2026
