06/01/2024
Foi este un #Nadal
fantástico, cheo de actividades para a cativada nestas datas tan importantes para a conciliación das familias! 
Grazas por ter gozado connosco do #NadalEnCompostela
e #FelizDíaDeReis
!
#CompostelaEstrelaDoNadal
#UnNadalParaVivilo
26/12/2023
Volve a pista de xeo ecolóxica instalada na #Alameda! 
100 metros cadrados de diversión para todxs ata o 7 de xaneiro absolutamente de balde! 
Sesións de mañá e de tarde
31 de decembro: apertura só de mañá
1 e 6 de xaneiro: pechada
Recoméndase reservar para evitar esperas
Info e reservas aquí 
https://bit.ly/nadalencompostela-pistadexeo
#CompostelaEstrelaDoNadal
#UnNadalParaVivilo
O venres arranca ‘Alameda en Xogo’ dentro da programación de ‘Compostela, a Estrela do Nadal’
20/12/2023 O próximo venres, coincidindo co inicio das vacacións escolares, comeza ‘Alameda en Xogo’, un programa impulsado polos departamentos de Comercio e Lingua, e enmarcado na programación de ‘Compostela, a Estrela do Nadal’. A concelleira de Dereitos e Servizos Sociais, Promoción Económica e Xuventude deu conta hoxe das actividades, entre as que destacou a apertura dunha pista de xeo ecolóxica, da que se poderá desfrutar de balde. María Rozas incidiu na aposta do Goberno por “unha programación de Nadal moi familiar, moi pensada para o ocio, para termos unhas propostas que sexan moi vividas por todos e todas”. Desde o 22 de decembro ata o 7 de xaneiro, a Alameda será un punto central das actividades de Nadal, grazas ao programa “Alameda en Xogo”. Na carpa que xa está instalada haberá diferentes actividades, como unha parede de escalada, un xogo de conos interactivos para poñer a proba os reflexos dos e das participantes; unha piscina de bolas, un xogo de pesca de parrulos, ou outro para aprender a ordeñar unha vaca.
Pista de xeo con reserva previa
Un dos elementos máis atractivos da Alameda en Xogo será a pista de xeo ecolóxica que se vai poder utilizar de balde. Será unha pista de 100 metros cadrados, cunha capacidade de 25 persoas en cada sesión.
Para axilizar as entradas e controlar o aforo poderase realizar unha reserva a través da web https://bit.ly/nadalencompostela-pistadexeo. As entradas son sen coste, e poderanse reservar como máximo 5 entradas por persoa se se trata de pases normais con patíns, e como máximo 3 entradas se son pases con axuda do patinador e casco a maiores. Tamén se poderán facer as reservas nas propias instalacións, onde haberá monitores para realizar esa xestión e onde tamén se exhibirá o código QR que dirixe á app de reservas.
As actividades da Alameda en Xogo desenvolveranse todos os días de 11h a 14h e de 17h a 20.30h. O 24 e 31 de decembro será só horario de mañá; e os días 25 de decembro, 1 e 6 de xaneiro estará pechado.
María Rozas aproveitou para anunciar que tamén a partir do venres haberá un novo elemento de xogo na praza Roxa, outra mininoria, que se instalará ao carón do tren infantil.
Pasarrúas para a dinamización comercial
A concelleira de Promoción Económica tamén deu conta doutra iniciativa para a dinamización comercial nestas datas, que comezará esta mesma tarde. Trátase dun espectáculo de pasarrúas a cargo de Troula Animación, co espectáculo “A luz do camiño”, similar ao que se puido ver na xornada de encendido da iluminación de Nadal. Os percorridos comezarán ás 18.00 horas, e terán unha duración dalgo máis dunha hora.
Esta tarde, o pasarrúas será no Ensanche, con saída desde Frei Rosendo Salvado e remate na Praza Roxa, pasando por Ramón Cabanillas, República Arxentina, Xeneral Pardiñas, Carreira do Conde, Rapa da Folla, Montero Ríos, Alfredo Brañas e República do Salvador.
Mañá, o espectáculo poderase ver na zona histórica. Sairá da Praza do Obradoir e pasará por Praterías, rúa do Vilar, Praza do Toural e Rúa Nova, para rematar de novo no Obradoiro.
Os pasarrúas repetiránse os días 3 e 4 de xaneiro, tamén no Ensanche e na zona vella, con percorridos similares Durante os percorridos, regalaránselle ao público as estrelas do Nadal compostelán.
Direccións relacionadas
- Programa de ‘Compostela, a Estrela do Nadal’
- Reserva pista de xeo: https://bit.ly/nadalencompostela-pistadexeo
